لنډه کیسه
لیکواله: نیلاب نصیري
ژباړه: صدیق الله بدر
... او یوه بله ورکه
هغه ورځ په بازار کې داسې عجیبه شور او غوغا خپره وه چې ته وا اختر رانږدې دی او خلک د خپلې اړتیا وړ توکو د رانیولو لپاره بازار ته راتوی شوي وو. زما هم یو دوه مهم څيزونه په کار و او ورپسې ګرځېدم چې ناڅاپه مې سترګې پر يوې نازولې نجلۍ ولګېدې چې سترګې يې له اوښکو، اندېښنو او وېرې ډکې وې. شونډې يې رپېدې، پيکي يې خواره واره او ډېره مظطربه معلومېده. هر یوه لاروي ته يې کتل او په وېرې او ژړا يې د خلکو منځ کې ځان ته لاره خلاصوله. راټېټه شوم او په مينه مې ورته وويل: (( سلام نازولې، چېرته ځې؟ مور جانه دې چېرته ده؟))
