ویناوال: صدیق الله بدر
خبر
لورکۍ مې ډېره وي خوشاله د جمعې ورځې ته
ټوله اوونۍ ورځې شمېري جمعې ته
خو دا جمعه زه نه يم
ان له شنبې راهيسې نه يم کور کې
دوه درې اوونۍ به يمه لرې
خپله لورکۍ نه وينم
نن يې په فون کې راته وويلې
سبا جمعه ده خو ته کور کې نه يې
تا وې همدا چې دې خبر جوړ کړ
په منډه بېرته راځې
وايه شو څنګه خبر
څومره شو اوږد خبر
پلاره پرېږده يې راشه
جمعه کې کار نه کړي څوک
وايي کندېږي ذهن
لور ته ځواب نه لرم
خو زه خبر پسې يم
خبر جوړېږي خبر ختمېږي نه هيڅ
په هر خبر پسې خبر وي يو بل
زما لورکۍ وېرېږم
هسې نه نور هيڅکله
په بلې ورځې باندې
چېرې هم ونه تړي
خپله ماشومه هيله
جمعې ته هم کله خوشاله نه وي
۱۳۹۲.۱۰.۷
