هسي

هسې 
تاوې زړه کې مې خبرې 
ماوې څه دي راته وايه 

په
موسکا دې وې چې هسې 
ما وې هسې دې قربان شم 
په دې هسې کې دې څه دي ؟ 
څه خواږه دي که تراخه دي؟
دا ګلونه که اوبه دي ؟ 
وايه څه دې چې په زړه دي 
***
تا وې نه نه هېڅ هم نه شته 
نه خواږه شته نه تراخه شته 
نه ګلونه نه اوبه شته 
خو بس هسې يو څه شته دي 
نه پوهېږم چې دا څه دي 
په دې زړه کې مې پراته دي 
څه دردونه دي خواږه دي 
کله لږ شي کله ډېرشي 
لاس تر غاړې مې چاپېر شي 
راياديږي راياديږي 
نه هيريږي نه به هېر شي 
***
ماوې يا شومې بخيلې 
ننواتې درلېږمه 
خپلې ماتې ګوډې هيلې 
دا خواږه خواږه دردونه 
پاڅه ټول راسره نيم کړه 
نيم به ستا نيم به زما شي 
دا په تول راسره نيم کړه 
تاوې نه کيږي شاعره 
ما وې ولي ولي ولي ؟
تا وې هسي هسي هسي 
ماوې هسي دې قربان شم 
تا وې ولي ولي ولي 
ماوې هسي هسي هسي

پيرمحمد
کاروان